BULEUEN RAMADHAN

  • Whatsapp
syair dalam berita

Alhamdulillah Allah pujoe

Nyang po dum nyoe ban sineuna,

Bacaan Lainnya

Meuseulaweut keu Nabi tanyoe

Muhammad sidroe nyang mulia,

 

Rahmat Allah limpah meukatoe

Geubi keutanyoe dalam dônya,

Buleun Ramadhan nyan hai adoe

Dalam thôn nyoe teumèe teuma,

 

Umu panyang katrang tanyoe

Teumèe jinoe buleun mulia,

Buleun ibadat that le yum nyoe

Malam uroe meuganda fahla,

 

Beudoh ibadat bèk that laloe

Bèk jeut rugoe sia sia

Kesempatan malam uroe

Buet meubudhoe nyang takira,

 

Ramadhan nyan keu geu tanyoe

Malam uroe ibadat beuna

Melipat ganda fahla tiep syoe

Bèk keuh laloe hana guna,

 

Tapuasa teuma ‘oh uroe

Malam tanyoe Qur’an tabaca,

Zikir Seulaweuet beut bèk laloe

Ngon Allah toe khusyuek taqwa,

 

Buet teuhbeugléh meucéh tanyoe

Malam uroe beuta jaga

Bèk menghasut jeuheut tuloe

Bèk buet rugoe ganda desya,

 

Kon puasa cuma theun droe

Hanjeut pasoe bu lam runggha,

Anggota tujôh beurôh pakoe

Laba rugoe beuta kira,

 

Bèk ceumaci iri tanyoe

Bèk kreuh gigoe ta teumampa,

Bèk meu upat hujat rangsoe

Bèk sabé droe dawi dawa,

 

Buleun ramadhan nyan lé tanyoe

Bèk meulaloe bak buet désya,

Beudoh ibadat beubrat beutoe

Malam uroe keu Rabbana,

 

Tameulakèe teuntèe jinoe

Bandum tanyoe beulam Ridha,

Seulamat iman lam dônya nyoe

Uroe dudoe lam Syuruga,

 

Cek Medya Hus

Cot Puklat 4 Ramadhan 1440 H,

9 Mei 2019 M.

Pos terkait