Pemilu Katoe

  • Whatsapp
karikatur pemilu
Foto: Doc Pri

Syair : Cek Medya Hus

Alhamdulillah Allah tapujoe

Bacaan Lainnya

Nyang peujeut tanyoe seureuta alam,

Rahmat leupah le geubi keutanyoe

Tarasa keudroe lepah le macam,

 

Aneuk cémpala ateuh bak puntoe

Aneuk beuragoe ateuh bak balam,

Pemilu karap meuhat lam Nanggroe

Rata jeut sagoe ureueng meurantam,

 

Suai meumiléh meucéh kali nyoe

Sigo geutanyoe wahé e rakan,

Piléh presiden teken siuroe

Caleg lom dudoe DPD lheuh nyan,

 

Pemilu serentak hai bapak kamoe

Rata jeut sagoe geulaksanakan,

Piléh pemimpin toh yakin bak droe

Bèk jeut keu paloe ikot atôran,

 

Bagi pemileh meucéh dum jinoe

Rata lam nangroe kana pilihan,

Ka meusoe piléh pojéh ngon ponyoe,

Dan tim kameusoe kana sasaran,

 

Meunan cit timses bereh jeut sagoe

Malam ngon uroe mita dukungan,

Jak lhat baliho ato jeut sagoe,

Gamba meupudoe bak bineh jalan,

 

Pesta demokrasi beumeukri tanyoe,

Jalan jeut sagoe sesuai atôran,

Bèk karu karu hadu sabé droe

Nyo meunan bagoe kahana sopan,

 

Dukung mendukung langsông jeut sagoe

Takalon jinoe dum na pasangan,

Jak silaturrahmi geupeuturi droe

Ba Bungöng jaroe kadang meujmeujanan jan,

 

Suai pemilu bèk karu tanyoe,

Piléh nyang heut droe wahé e rakan,

Bèk jak paksa gob yue top awak droe,

Janji meupudoe rakyat jak padan,

 

Nyang hana hana haba jak rampoe

Paksa piléh nyoe pujoe pilihan,

Pubrôk gob laén ceukén keu gobnyoe

Nyo meunan bagoe salah hai rakan,

 

Secara bijak tajak buet tanyoe

Bèk cara kacoe lingkeue atôran,

Semoga demokrasi meuri lam nanggroe

Pemilu seleusoe gléh dengon aman,

 

Bèk intimidasi caci ngon pujoe,

Peungeut jeut sagoe kadang gop tatran,

Mita kurusi bèk keuji paloe

Cara meubudhoe talaksanakan,

 

Bèk wap pemilu ngon abu kachoe

Ngon syédara droe kasalah waham,

Sabé sibangsa ka tameu eungkhoe,

Cukôp that rugoe meunyo lagèe nyan,

 

Moga pemilu sukses kali nyoe

Meubèk na kachoe semoga aman,

Jaga ketertiban di dalam Nanggroe,

Moga jeut sagoe terasa aman,

 

Dari : Cek Medya Hus,

Lambarô 12 – 3 – 2019

Pos terkait