Syair Aceh – Berqurban

  • Whatsapp

Assalamuꞌalaikum kawôm meutuah
Saleuem sipatah keu bandum waréh
Lewat radiô meu atô surah
Saleuem ukhuwah tanda meugaséh

Kruseumangat Rahmat meulimpah
Dari Po Tallah keunoe meulapéh
Beusehat tubôh bèk rôh buet salah
Ngon izin Allah beu lheueh teumuléh

Bacaan Lainnya

Ammabakdu laju tapeugah
Deungo meutuah ban mandum waréh
Idul Adha katrôh ka jeulah
Nyang hudép mewah Qurban hai waréh

Bak uroe Raya Haji abi meutuah
Soe-soe na mudah neu qurbeun meucéh
Beuneutem Qurbeun peureumeun titah
Dalam Syari’ah sit ka meutuléh

Uroё Raya Qurban rakan meutuah
Tanyoё beubagah peduli nyang peudéh
Tatém sie Qurban dan meusideukah
Deungon ikhlah fahla meutindéh

Peuelom kakaya harta meulimpah
Neubi lé Allah harta meubaréh
Ta Qurbeun laju teungku meutuah
Ridha po Tallah keurija nyang gléh

Karna Qurbeun jameun sejarah
Bak Ibrahim jeulah asai phôn idéh
Peurintah yue sie nyan aneuk lidah
Ismail ceudah nyang that geu gaséh

Karna geupubuet deungon ikhlah
Aneuk deungon Yah h’ana meulanggéh
Karna geuteupeue peurintah Allah
Geupubuet bagah Qurbeun lé meucéh

Teuma oh dudoe geugantoe kibah
Dalam sejarah calitra wajeb tapatéh
Dalam Alquran neukalon bagah
Dali that jeulah bèk na syok guréh

Sampé ′anjinoe tanyoe nyang mewah
Ateueh peurintah tatém hai waréh
Bèk takôt habéh meukréh pèng lam tah
Tuhan nyang balah gantoe meulapéh

Deungon ta Qurban rakan meutuah
Ureung nyang susah hana lé seudéh
Uroe makmeugang kadang that susah
Meu keubreueh mirah tan pèng dalam kéh

Oh kalheueh na breueh that weueh hai Ayah
Sie hawa leupah ngon bloe pèng habéh
Untung na Qurbeun bak leuen Meunasah
Rahmat meuleupah sie na si iréh

Nyan rasa Syukur ureueng nyang mewah
Harta meulimpah geubi meulapéh
Dan nilai ta’at rahmat bak Allah
Islamiyah ureueng iman gléh

Buleuen Haji nyoe tanyoe hai Ayah
Seumeusie bagah Qurbeun meucéh
Dan bacut saran rakan meutuah
Leumo keubeue sah nyang gèt gèt piléh

Kareuna Qurbeun deungon ikhlah
Nyang tasie beupah bek na meulaqnggéh
Bèk leumo capiek geutiek ka patah
Nyo meunan ulah ikhlah h’ana gléh

Takalon keubeue nyang hayeue gagah
Kamèng pih nyang pah nyang gap gap beutéh
Bèk meupeunyakét ka sakét babah
Lagèe nyan ulah désya meutindéh

Nyan keuh anjuran rakan meutuah
Beutatém papah deungon ta patéh
Uroe raya Haji meuri meuriah
Tapeukong ukhuwah sinoe ngon sidéh

Semangat Qurban Islam nyang indah
Syiar kaleumah ukhuwah han abéh
Peuduli sesama poma ngon ayah
Seunang ngon susah meugaséh

Cahya leupah trang cemerlang ceudah
Bintang dua blah h’analé berséh
Mari berqurban rakan meutuah
Ngon karna Allah ngon haté putéh

Tanda tasyukur makmur ka leumah
Raseuki mudah neubi lé meulapéh
Dan nilai Taqwa keupada Allah
Harta meulimpah na nilai jih gléh

Hareuta kageubi taci kalon sah
Raseuki mudah panè hai waréh
Rahmat Ilahi syukuri bagah
Ngon haté ikhlah ta sumbang keudéh

Beutatém derma ngon meuseudeukah
Bak jalan Allah tatém meu abéh
Bak Idul Adha taikôt sunnah
Keurija bagah ta Qurban meucéh

Semoga rahmat meuhat meulimpah
Harta meutamah dan kong lom gaséh
Tanyoe tasyukur keu pada Allah
Lam jeut jeut sa’ah ngon haté putéh

Èt noe keuh Caé rawé sipatah
Lôn lakèe meu’ah ka nibak waréh
Kadang na haba gasa h’ana pah
Buhu pih salah canèk ngon baréh

Peue nyang meupeutrôk bé ôk hai ayah
Beujeut keu dakwah soe nyang na patéh
Lôn kheun sekian rakan meutuah
Alhamdulillah karangan habéh.

Pos terkait