Syair Dalam Berita – Kampanye

  • Whatsapp
syair dalam berita

Aneuk cém pala ateuh bak peuték

Aneuk cém burék ateuh bak sawôh,

Bacaan Lainnya

Nyoe katrôh masa partai politék

Ili ngon mudék kampanye riyôh,

 

Masa kampanye ta eu meunarék

Panggông ka geu’ék hana lé teudôh,

Mita simpati visi misi reuték

Mangat meunarék haba gèt ratôh,

 

Lethat takalon bangön meunarék

Kampanye politék ka hana teudôh,

Janji ka janji dumkri geureulék

Ban mandum bayék haba that utôh,

 

Segala lini janji geureuték

Haba geupeu ék mandum geubungkôh,

Ladôm bak medsos that jroh geularék

Program nyang bayék narit that utôh,

 

Ladôm bak koran padan bang adék

Haba meunarék that got geusaôh,

Na bak radio a-ô lam bilék,

Iklan meunarék haba meuratôh,

 

Nacit bak tivi janji geu peu ék

Pemirsa tabék ngon jaroe siplôh

Mohon bantuan dukungan adék

Santun ngon bayék narit that utôh,

 

Nyang jak ugampông langsông meunarék

Kampanye reuték cit hana teudôh,

Peusaho masa cutda ngon yah cék,

Ba bungkôh burék macam peunajôh,

 

Dukung mendukung langsông teumabék

Hidup keumeukék ta eu that riyôh

Mandum gèt haba hana nyang picék,

Hana nyang asék bah teubiet reu’ôh,

 

Masa kampanye hayeue meunarék

Ili ngön mudék tunöng ngön barôh,

Masa mita su bak abu makcék

Jalan keuneuk ék mita ôh sunggôh,

 

Lheuh Krueng Baru laju u meukék

Moto nyang ta ék bhan ka beureutôh,

Ingat syédara nyang ka meupoliték

Cara nyang bayék kampanye labôh,

 

Jaga atôran sopan meunarék

Padan bang adék bèk cara riyôh,

Bèk caci maki keuji ngön kriték,

Bèk ta meugrék grék peuleumah boh sôh,

 

Bèk tapeubrôk gop meuh’öp meuasék

Kheun meuh’öp burék haba tareubôh,

Ngon cara bijak tajak meunarék

Bèk na meugurék meuriyôh riyôh,

 

Mita suara cara nyang bayék

Bèk tameureulék meusa’ôh saôh,

Mita kedudukan rakan bèk tasék,

Ôh watèe taék bèk gop tareulôh,

 

Masa kampanye pemilu beu bayék

Abang ngon adék bèk tiyôh riyôh,

Bèk wab peutaba janji politék

Abu ngon makcék meuputôh putôh,

 

Bèk bak kampanye le karu adék

Sidroe ureueng ék saboh Gampông riyôh,

Karna na bak haba hana nyang bayék,

Adu politék ukhuwah putôh,

 

Jaga demokrasi lam negri bayék

Jaga politék nanggoe bèk runtôh,

Jaga kedamaian aman meunarék

Pemilu bayék ke utuhan kukôh,

 

Lambarô, 28 Maret 2019

Pos terkait